Hemişelik Bitaraplygymyzyň şanly 30 ýyllygy giňden bellenilýän Halkara parahatçylyk we ynanyşmak ýylynda ýurdumyzda ähli ugurlar bilen bir hatarda, ylym-bilim ulgamynda-da guwandyryjy üstünlikler gazanylýar. Ýurdumyzda amala aşyrylýan düýpli özgertmeleri ylmy taýdan esaslandyrmak asylly ýörelgä öwrüldi. Şunda ähli ulgamlara ylmyň gazananlaryny giňden ornaşdyrmak, ýokary bilimli hünärmenleridir ylmy işgärleri taýýarlamak maksady bilen kabul edilýän çözgütleriň ähmiýeti örän uludyr. Hormatly Prezidentimiz ýurdumyzda ýaşlaryň döwrebap bilim-terbiýe almagy, ukyp-başarnyklaryny ýüze çykarmaklary üçin bilim edaralarynyň işini kämilleşdirmek, okuw meýilnamalaryny, maksatnamalaryny, okuw kitaplaryny halkara tejribelere laýyklykda döwrebaplaşdyrmak boýunça işleri dowam etdirmegiň, mugallymlaryň hünärini ýokarlandyrmak boýunça yzygiderli işleri geçirmegiň, bilim ulgamynyň maddy-enjamlaýyn binýadyny berkitmäge gönükdirilen çäreleri alyp barmagyň zerurdygyny hemişe nygtaýar. Ýurdumyzy ylmy taýdan ösen döwlete öwürmek üçin ylmy-barlag işlerini dowam etdirmegiň, bu ugurda halkara hyzmatdaşlygyň gerimini giňeltmegiň möhümdigini aýdýar.
Gahryman Arkadagymyzyň milli bilim ulgamynda başyny başlan giň möçberli özgertmeleriniň hormatly Prezidentimiziň baştutanlygynda üstünlikli durmuşa geçirilmegi netijesinde, ösüp gelýän ýaş nesilleriň halkara ylmy we döredijilik bäsleşiklerine gatnaşyp, zehinlerini açmaklary, ukyp-başarnyklaryny artdyrmaklary üçin hem ähli zerur şertler döredilýär. Halkara parahatçylyk we ynanyşmak ýylynda gazanylýan üstünlikler mekdep okuwçylaryny täze ýeňişlere ruhlandyrýar. Ajaýyp zamanamyzda dünýäniň ylym-bilim giňişliklerinde ynamly öňe barýan döwletimizde bilim ulgamy täze mazmun bilen baýlaşdy. Şonuň bilen baglylykda, bilim ulgamynda kämil kanunçylyk binýady hem döredildi. Täze taryhy döwürde ýaş nesliň ylym-bilimli, edep-terbiýeli bolup ýetişmegi, döredijilik bilen meşgullanmagy üçin ähli şertlerdir mümkinçilikler döredilýär. Bu günki gün iň täze we innowasiýa enjamlardan, tehnologiýalardan baş çykarýan, ruhy taýdan ösen, beden taýdan sagdyn, giň gözýetimli nesiller kemala gelýär, ýaş nesillere ýokary derejede bilim berilýär, hünär öwredilýär.
Berkarar döwletiň täze eýýamynyň Galkynyşy döwrüniň özboluşly aýratynlygy ylym-bilim ulgamynyň has oýlanyşykly ösdürilmeginde, ykdysady kuwwatyň ylmy taýdan esaslandyrylyp, netijeli ulanylmagynda, halkymyzyň ýaşaýyş-durmuş üpjünçiliginiň ýokarlandyrylmagynda, saglygy goraýyş, syýahatçylyk we beýleki ulgamlaryň işiniň kämilleşdirilmeginde aýdyň duýulýar. Garaşsyz, hemişelik Bitarap Watanymyzda durmuşa ornaşdyrylýan bu beýik işler halkymyzyň, aýratyn-da, ýaşlarymyzyň kalbynda Gahryman Arkadagymyzyň, Arkadagly Gahryman Serdarymyzyň amala aşyrýan beýik işlerine bolan çäksiz buýsanç duýgularyny döredýär. Bularyň ählisi bagtyýar durmuşymyzyň eşretlerine buýsanyp ýaşamaga, ylym-bilim öwrenmäge, döretmäge, gurmaga egsilmez güýç-kuwwat berýär.
Ogulsuraý BERDIÝEWA,
Aşgabat şäherindäki ýöriteleşdirilen 74-nji «Bagtyýar nesiller» orta mekdebiniň mugallymy.
"Mugallymlar gazeti"
10.03.2025ý №23
çeşme
