Türkmenistanyň Prezidenti Serdar Berdimuhamedow 28-nji awgustda sanly ulgam arkaly geçiren Ministrler Kabinetiniň nobatdaky mejlisinde 2-nji sentýabrda ýaşulularyň gatnaşmagynda welaýatlarda bugdaý ekişine «bismilla» bilen girişmäge ak pata berdi.
Güýzlük bugdaý ekişine girişilmegi mynasybetli ýurduň ähli sebitlerinde welaýat we etrap häkimlikleriniň wekilleriniň, daýhan birleşikleriniň, oba hojalygyna dahylly edara-kärhanalaryň ýolbaşçylarynyň, agronomlaryň, mehanizatorlaryň, alymlaryň, tejribeli kärendeçileriň, hormatly ýaşulularyň gatnaşmagynda tejribe maslahatlary geçirildi.
Ýeri gelende bellesek, Türkmenistanyň Prezidentiniň «Türkmenistanda 2027-nji ýylda bugdaýyň bol hasylyny öndürmek hakynda» Kararyna laýyklykda, ýurt boýunça 690 müň gektar meýdanda güýzlük bugdaý ekişi geçirilip, şonça ýerden 1 million 400 müň tonna hasyl almak maksat edinilýär.
Şol sanda Ahal welaýatynda 400 müň tonna, Balkan welaýatynda 80 müň tonna, Daşoguz welaýatynda 265 müň tonna, Lebap welaýatynda 310 müň tonna, Mary welaýatynda 345 müň tonna bugdaý hasylyny öndürmek meýilleşdirilýär.
Ýurduň ekin meýdanlarynda bugdaýyň bol hasyl berýän beýleki görnüşleri bilen bir hatarda, Oba hojalyk ministrliginiň Ylmy-barlag däneçilik instituty tarapyndan döredilen «Serdar», «Arkadag» we «Pyragy» tohumlary-da ekiler. Bu barada «Türkmenistan» gazetiniň şu günki sanynda habar berildi.
Ozal habar berşimiz ýaly, 2026-njy ýylda ýurduň ak ekin ussatlary bugdaýyň 1 million 400 müň tonnadan gowragyny öndürip, bu babatdaky şertnamalaýyn borçnamalaryny artygy bilen berjaý etdiler.
çeşme
